…सावधान तोतया एजंट, मध्यस्थांपासून!

१० लाखांचे कर्ज मिळवून देतो म्हणून अनेकांची फसवणुकीच्या तोंडी तक्रारी

वसंतराव नाईक विकास महामंडळ कर्ज योजना;   नागरिकांनी अफवांना बळी पडू नये

कन्या न्यूज नेटवर्क ||

सोलापूर  :  जिल्ह्यातील विमुक्त जाती व भटक्या जमाती तसेच विशेष मागासप्रवर्गातील नागरिकांना वसंतराव नाईक विमुक्त जाती व भटक्या जमाती विकास महामंडळाकडून कर्ज मिळवून देतो असे सांगून रोख रक्कमेची मागणी केली जात आहे. महामंडळामार्फत कोणत्याही एजंट  अथवा मध्यस्थाची नेमणूक केलेली नाही.  नागरिकांनी सदर अफवांना बळी पडून कोणत्याही व्यक्तीशी आर्थिक देवाण घेवाण करू नये, असे आवाहन वसंतराव नाईक विकास महामंडळकडून करण्यात आले आहे.

वसंतराव नाईक विमुक्त जाती व भटक्या जमाती विकास महामंडळ (मर्या) जिल्हा कार्यालय – सोलापूर “या महामंडळाकडून १०  लाख रुपये  कर्ज मिळवून देतो म्हणून जिल्ह्यातील विमुक्त जाती व भटक्या जमाती तसेच विशेष मागासप्रवर्गातील लोकांकडून काही रोख रक्कमेची मागणी केली जात आहे. त्यानंतर आठ दिवसामध्ये तुम्हाला १० लाख रुपयाचे कर्ज मिळणार व त्यामधील दोन ते तीन लाख रूपये वरिष्ठ अधिकारी यांना द्यावे लागतील. सदर कर्जाची तुम्हाला परतफेड करण्याची आवश्यकता नाही,” असे म्हणून जिल्ह्यामध्ये काही तोतया व्यक्तींनी लोकांनाकडून पैसे घेऊन फसवणूक करीत असल्याच्या तोंडी तक्रारी  वसंतराव नाईक विकास महामंडळ, सोलापूर  या कार्यालयाकडे प्राप्त झालेल्या आहेत.

जिल्ह्यातील विमुक्त जाती व भटक्या जमाती तसेच विशेष मागासप्रवर्गातील लोकांनी अश्या अफवांना बळी पडू नये, अशी कोणतीही योजना या महामंडळाकडून राबवली जात नाही. या महामंडळामार्फत कोणत्याही एजंट/ मध्यस्थाची नेमणूक केलेली नाही. सदर अफवांना बळी पडून आपण कोणत्याही व्यक्तीशी आर्थिक देवाण घेवाण करू नये, अन्यथा सदरहू नुकसानीस महामंडळ जबाबदार राहणार नाही.

वसंतराव नाईक विमुक्त जाती व भटक्या जमाती विकास महामंडळाकडून राबविण्यात येणा-या योजनेची योग्य माहिती वसंतराव नाईक विमुक्त जाती व भटक्या जमाती विकास महामंडळ (डॉ. बाबासाहेब आंबेडकर सामाजिक न्याय भवन, दुसरा मजला, बिग बाजार समोर, सात रस्ता, सोलापूर) येथील कार्यालयाशी (दूरध्वनी क्रमांक: ०२१७- २९९२०८०) संपर्क साधावा, असे आवाहनही वसंतराव नाईक विकास महामंडळकडून करण्यात आले आहे.