सोलापूर जिल्ह्यातील ३९ गावांमधील ४ हजार ८५९ नागरिकांना स्वामित्व सनद वाटप

आमदार सचिन कल्याणशेट्टी, जिल्हाधिकारी कुमार आशीर्वाद यांच्या हस्ते सनद वाटप शुभारंभ

कन्या न्यूज नेटवर्क ||

सोलापूर   : केंद्र सरकारच्या स्वामित्व योजनेंतर्गत  शनिवार, दि. १८ जानेवारी २०२५ रोजी संपूर्ण देशातील २४६ जिल्ह्यातील ५८ लाख लाभार्थी यांना पंतप्रधान नरेंद्र मोदी यांच्या हस्ते आभासी पध्दतीने सनद वाटप कार्यक्रम झाला. यावेळी सोलापूर जिल्ह्यातील ३९ गावांमधील ४ हजार ८५९ स्वामित्व सनद वाटप जिल्हाधिकारी कुमार आशीर्वाद, आमदार सचिन कल्याणशेट्टी आदी मान्यवरांच्या हस्ते करण्यात आले.

स्वामित्व सनद वाटप कार्यक्रम नियोजन भवन येथील सभागृहात  झाला.  अध्यक्षस्थानी आमदार सचिन कल्याणशेट्टी होते. यावेळी जिल्हाधिकारी कुमार आशीर्वाद, मुख्य कार्यकारी अधिकारी कुलदीप जंगम, निवासी उपजिल्हाधिकारी मनिषा कुंभार, जिल्हा भूमिलेख अधीक्षक दादासाहेब घोडके, नगर भूमापन अधिकारी गजानन पोळ यांच्यासह नागरिक मोठ्या संख्येने उपस्थित होते.

जिल्हा अधीक्षक भूमी अभिलेख   घोडके यांनी स्वामित्व योजनेचे व सनदेचे महत्व विषद करीत त्यासंदर्भातील चित्रफित सादर केली. यावेळी जिल्ह्यातील ३९ गावांमधील ४८५९ नागरिकांना स्वामित्व हक्काची सनद मान्यवरांच्या हस्ते वाटप करण्यात आली. प्रारंभी जिल्हाधिकारी कुमार आशीर्वाद आ. सचिन कल्याणशेट्टी व मान्यवरांच्या हस्ते दीप प्रज्वलन करून सनद वाटप कार्यक्रमाचा शुभारंभ करण्यात आला.  प्रास्ताविक  घोडके, आभार प्रदर्शन गजानन पोळ यांनी केले.

स्वामित्व योजनेंतर्गत राज्यपाल  राधाकृष्णन आणि मुख्यमंत्री  फडणवीस यांच्या हस्ते महाराष्ट्राच्या पालघर जिल्ह्यातील विनोद आत्माराम पिंपळे, माया विकास पिंपळे, सदानंद वामन पिंपळे, दिलीप यशवंत सपाटे, प्रकाश शांताराम रावते, अलिबाग जिल्ह्यातील रोहण कृष्णा पाटे, शैलेश यशवंत ठाकूर, मिलिंद पांडुरंग पडते, प्रभाकर शांताराम नाईक, अंकुश सिताराम धाके आणि ठाणे जिल्ह्यातील विष्णू चुरू आंबेकर, यमुनाबाई रामचंद्र पाटील, मधुकर तुकाराम पाटील आणि चेतन गजानन पाटील यांना सनद वाटप करण्यात आले.