स्वच्छता पखवाड्यात सोलापूर विभागातर्फे प्रवाशांना कापडी पिशव्यांचे वाटप
कन्या न्यूज नेटवर्क ||
सोलापूर : रेल्वे बोर्डाच्या स्वच्छता पखवाडा उपक्रमांतर्गत, सोलापूर विभागाच्यावतीने “नो सिंगल यूज प्लास्टिक” या विशेष मोहीम राबविण्यात येत आहे. या मोहिमेचा शुभारंभ विभागीय रेल्वे व्यवस्थापक नीरज कुमार दोहरे, अपर विभागीय रेल्वे व्यवस्थापक अंशुमाली कुमार यांच्या उपस्थितीत रेल्वे कार्यालयात करण्यात आला. यावेळी जनजागृतीचा एक भाग म्हणून कापडी पिशव्या वाटण्यात आल्या. त्यावर पर्यावरण विषयक संदेश छापण्यात आले होते.
या कार्यक्रमादरम्यान अधिकारी आणि कर्मचाऱ्यांना सिंगल यूज प्लास्टिकच्या दुष्परिणाम या विषयी जनजागृती करण्याचे आवाहन करण्यात आले. विभागीय रेल्वे व्यवस्थापक नीरज कुमार दोहरे यांनी सर्वांना मोहिमेत सक्रिय सहभाग घेण्याचे आवाहन केले. तसेच प्लास्टिकमुळे होणारे पर्यावरणीय धोके लोकांपर्यंत पोहोचवण्याचा संकल्प व्यक्त केला. यावेळी कर्मचाऱ्यांनी स्टेशन, रेल्वे कॉलनी आणि वसाहतींमध्ये यात्रेकरू आणि कुटुंबीयांना सिंगल यूज प्लास्टिकपासून दूर राहण्याचा संदेश दिला.
कार्यक्रमाच्या समारोपप्रसंगी वरिष्ठ विभागीय संरक्षा अधिकारी, सोलापूर यांनी या उपक्रमात सहभाग घेतलेल्या सर्व अधिकारी व कर्मचाऱ्यांचे आभार मानले. रेल्वे विभागाच्या या उपक्रमामुळे प्लास्टिक मुक्ती संदेश प्रभावीपणे पसरवण्यात येईल, असा विश्वास व्यक्त करण्यात आला.