दिव्यांग प्रमाणपत्र शिबिरात पाच दिवसात ४ हजार ६१ लाभार्थ्यांची तपासणी

जिल्हाधिकारी कुमार आशीर्वाद ; दिव्यांग व्यक्ती अस्मिता अभियान 

एकूण २२ दिव्यांग प्रमाणपत्र वाटप शिबिराच्या माध्यमातून १५ हजार ६६६                लाभार्थ्यांची तपासणी करून प्रमाणपत्र वाटपाचे नियोजन

कन्या न्यूज नेटवर्क ||

सोलापूर : जिल्ह्यात दिव्यांग व्यक्ती अस्मिता अभियान अंतर्गत तपासणी व निदान विशेष मोहीम दि. १९ ऑगस्ट २०२४ पासून सुरू झालेला आहे. पंढरपूर, अक्कलकोट तालुकास्तरीय शिबिरे झालेली आहेत. या दोन्हीही शिबिरात ३२६० दिव्यांग लाभार्थ्यांची तपासणी करण्यात आली. दि. २६ ऑगस्ट रोजीच्या शिबिराच्या पाचव्या दिवशी बार्शी येथे ८०१ लाभार्थ्यांची तपासणी करण्यात आली. असे एकूण पाच दिवसात ४ हजार ६१ लाभार्थ्यांनी या विशेष मोहिमेअंतर्गत तपासणी करून घेतलेली आहे. या अंतर्गत पात्र लाभार्थ्यांना दिव्यांगात्व प्रमाणपत्र त्यांनी दिलेल्या त्यांच्या पत्त्यावर टपालाद्वारे पाठवण्याची व्यवस्था प्रशासनाच्यावतीने करण्यात येत असल्याची माहिती जिल्हाधिकारी कुमार आशीर्वाद यांनी दिली.

जिल्ह्यात ही मोहीम दि. १९ ऑगस्ट ते दि. २३ सप्टेंबर २०२४ या कालावधीत राबविण्यात येत आहे. या अंतर्गत प्रत्येक तालुक्यात दोन दिवस याप्रमाणे २२ शिबिराचे आयोजन करण्यात आलेले आहे. या शिबिरातून १५ हजार ६६६ दिव्यांग लाभार्थ्यांना दिव्यांगात्वाची तपासणी करून प्रमाणपत्र देण्याचे नियोजन आहे. पंढरपूर, अक्कलकोट या दोन तालुक्यातील तीन हजार दोनशे सात लाभार्थ्यांची तपासणी झालेली आहे. बार्शी येथे दि. २६ व २७ ऑगस्ट रोजी ग्रामीण रुग्णालयात हे शिबीर घेतले जात आहे. तरी प्रत्येक तालुक्यातील पात्र लाभार्थ्यांनी या शिबिरात येऊन तपासणी करण्याचे आवाहन जिल्हाधिकारी आशीर्वाद यांनी केले.

तरी सर्व संबंधित शासकीय यंत्रणा व स्वयंसेवी संस्थांनी या शिबिराच्या ठिकाणी दिव्यांग व्यक्तींना कोणत्याही अडचण होणार नाही याची खात्री करावी. शिबिराच्या ठिकाणी संबंधित तालुक्यातून दिव्यांग लाभार्थीची ने-आण करण्याची व्यवस्था अत्यंत चोख झाली पाहिजे, यावर लक्ष ठेवावे. शिबिराच्या ठिकाणी दिव्यांग लाभार्थ्यांना सर्व आवश्यक सुविधा अत्यंत दर्जेदार मिळाव्यात, यासाठी आरोग्य यंत्रणा यांनी काळजी घ्यावी, अशा सूचना जिल्हाधिकारी आशीर्वाद यांनी देऊन शिबिरासाठी निधीची कोणतीही कमतरता नाही. येथे आवश्यक सुविधा पुरवण्यासाठी जिल्हा नियोजन समितीच्या माध्यमातून निधी देण्यात येणार असल्याचे त्यांनी सांगितले.

==============================================================================

दिव्यांग शिबिराच्या ठिकाणी अन्य शासकीय योजनांची माहिती-

 शिबिराच्या ठिकाणी लाभार्थ्यांच्या दिव्यांगत्वाची तपासणी करण्याबरोबरच या ठिकाणी दिव्यांग व्यक्तीसाठी असलेल्या अन्य सर्व शासकीय योजनांची माहिती प्रत्येक दिव्यांग व्यक्तीला सर्व संबंधित विभागाने त्यांची यंत्रणा त्या ठिकाणी ठेवून अत्यंत व्यवस्थितपणे समजावून सांगावी. दिव्यांग व्यक्ती योजनांसाठी पात्र ठरत असतील, तर त्यांना त्या योजनांचा लाभ मिळण्याबाबतचे अर्ज जागेवरच भरून घेण्याचे निर्देश जिल्हाधिकारी आशीर्वाद यांनी दिलेले आहेत. एक ही पात्र दिव्यांग लाभार्थी शासकीय योजना पासून वंचित राहणार नाही, यासाठी सर्व शासकीय यंत्रणेने दक्षता घ्यावी, असेही त्यांनी निर्देशित केले.

============================================================================

२२  शिबिरातून १५ हजार ६६६ दिव्यांग लाभार्थ्याची तपासणी होणार-

        जिल्ह्याच्या अकरा तालुक्यात प्रत्येकी दोन याप्रमाणे एकूण २२ शिबिराचे आयोजन करण्यात येत आहेत. यासाठी १५ हजार ६६ दिव्यांग लाभार्थ्यांनी नोंदणी केलेली आहे. जिल्ह्यातील दिव्यांगांची संख्या १ लाख १५ हजार ७५५ इतकी आहे. यातील ६८ टक्के ग्रामीण भागातील तर शहरी भागातील ३२ टक्के दिव्यांग संख्या आहे. आशाताई आणि यंत्रणेतील तालुका स्तरावरील संबंधित घटकांसाठी २७ कार्यशाळा घेण्यात आले आहे. त्यातून ३७४२ प्रशिक्षणार्थ्यांना प्रशिक्षण देण्यात आल्याची माहिती मित्राचे संचालक अभिजीत राऊत यांनी दिली.

==============================================================================

आरोग्य यंत्रणा परस्परात समन्वय ठेवावा-

या अभियानात आरोग्य यंत्रणा, गटविकास अधिकारी, तालुका आरोग्य अधिकारी, समाज कल्याणचे अधिकारी, स्वयंसेवी संस्था व मिशन इन्स्टिट्यूट फॉर ट्रेनिंग रिसर्च अँड ॲक्शन (मित्रा) यंत्रणेवर जबाबदारी असून, हे शिबीर यशस्वी करण्यासाठी सर्व यंत्रणांनी परस्परात समन्वय ठेवून काम करावे अशा सूचना जिल्हाधिकारी आशीर्वाद यांनी दिल्या. त्याप्रमाणे जिल्हा शल्य चिकित्सक कार्यालय अंतर्गत येणारे सर्व वैद्यकीय अधिकारी कर्मचारी, जिल्हा आरोग्य अधिकारी यांच्या अंतर्गत येणारे सर्व वैद्यकीय अधिकारी, कर्मचारी हे या शिबिरासाठी विशेष मेहनत घेत आहेत. असेच काम करून दिव्यांग व्यक्तींची योग्य तपासणी करून त्यांना वैश्विक प्रमाणपत्र वेळेत मिळण्यासाठी सर्वांनी दिलेली जबाबदारी चौक पणे पार पाडावी असेही त्यांनी सूचित केले.

=============================================================================

शिबीर वेळापत्रक-

जिल्ह्यातील दिव्यांग व्यक्तींना दिव्यांगत्व प्रमाणपत्र आणि वैश्विक ओळखपत्र देण्याकरीता दिव्यांगत्व प्रमाणपत्र तपासणी आणि निदान विशेष मोहिम कार्यक्रम शिबीर वेळापत्रक तालुका, लाभार्थी संख्या, शिबीर स्थळ, दिनांक, वार व वेळ निहाय पुढीलप्रमाणे –

• माळशिरस  – १७२०, ग्रामीण रुग्णालय, माळशिरस, दि. २९ व ३० ऑगस्ट २०२४, गुरुवार व शुक्रवारी सकाळी ९ ते दुपारी ३ वाजता. 
• सांगोला  – १८०३, ग्रामीण रुग्णालय, सांगोला, दि. २ व ३ सप्टेंबर २०२४, सोमवार व मंगळवारी सकाळी ९ ते दुपारी ३ वाजता. 
• करमाळा – १६२९, ग्रामीण रुग्णालय, करमाळा, दि. ५ व ६ सप्टेंबर २०२४, गुरुवार व शुक्रवारी सकाळी ९ ते दुपारी ३ वाजता. 
• मोहोळ – १८४१, ग्रामीण रुग्णालय, मोहोळ, दि. ९, १० व १२ सप्टेंबर २०२४, सोमवार, मंगळवार  व गुरुवारी सकाळी ९ ते दुपारी ३ वाजता. 
• माढा – १२९२, ग्रामीण रुग्णालय, कुर्डूवाडी, दि. १३ व १४ सप्टेंबर २०२४, शुक्रवार व शनिवारी सकाळी ९ ते दुपारी ३ वाजता. 
• मंगळवेढा – ८०८, ग्रामीण रुग्णालय, मंगळवेढा, दि. १७ व १९ सप्टेंबर 2024, मंगळवार व गुरुवार सकाळी ९ ते दुपारी ३ वाजता. 
• सोलापूर दक्षिण – १२९४, शासकीय वैद्यकीय महाविद्यालय व रुग्णालय, सोलापूर, दि. २० व २१ सप्टेंबर २०२४, शुक्रवार व शनिवारी सकाळी ९ ते दुपारी ३ वाजता. 
• सोलापूर उत्तर – ५६१, शासकीय वैद्यकीय महाविद्यालय व रुग्णालय, सोलापूर, दि. २३ सप्टेंबर २०२४, सोमवारी सकाळी ९ ते दुपारी ३ वाजता. 
• ============================================================================

पंढरपूर, अक्कलकोट तालुक्यातील शिबीर –

पंढरपूर – ग्रामीण रुग्णालय, पंढरपूर, दि. १९ व २० ऑगस्ट २०२४, सोमवार व मंगळवारी सकाळी ९ ते दुपारी ३ वाजता दिव्यांग तपासणी शिबिर झाले. अक्कलकोट ग्रामीण रुग्णालय, अक्कलकोट, दि. २२ व २३ ऑगस्ट २०२४, गुरुवार व शुक्रवारी सकाळी ९ ते दुपारी ३ वाजता शिबीर झाले.

 पंढरपूर, अक्कलकोट तालुक्यात एकूण ३२६० दिव्यांग लाभार्थीची तपासणी करण्यात आली. यामध्ये दृष्टीहीन ४२२, बौद्धिक अपंगत्व ६५६, श्रवणदोष ५१७, लोकोमोटर अपंगत्व १३६६, बालरोग २९९ असे एकूण ३२६० रुग्णांची तपासणी करण्यात आली.  शिबिराचा पाचवा दिवस व बार्शी तालुक्याचा पहिला दिवस दि. २६ ऑगस्ट २०२४ रोजी शिबिर घेण्यात आले. बार्शी येथील शिबिरात पहिल्या दिवशी ८०१ लाभार्थ्यांची तपासणी करण्यात आली. यामध्ये दृष्टीने ८४, बौद्धिक अपंगत्व १६४, श्रवणदोष १४१ लोकोमोटर अपंगत्व २९०, बालरोग ६१ तर औषधे देण्यात आलेले रुग्ण ६१ आहेत, अशी माहिती संचालक अभिजीत राऊत यांनी दिली. बार्शी  ग्रामीण रुग्णालय येथे दि. २७ ऑगस्ट रोजी सकाळी नऊ ते दुपारी तीन या वेळेत बार्शी तालुक्यातील जास्तीत जास्त लाभार्थ्यांनी तपासणीसाठी यावे, असेही आवाहन जिल्हाधिकारी आशीर्वाद यांनी केले.