“बर्ड फ्लू” बाबत सतर्क राहा; जिल्हा पशुसंवर्धन अधिकारी डॉ.एन.एल. नरळे यांचे आवाहन
कन्या न्यूज नेटवर्क ||
सोलापूर : “बर्ड फ्लू” बाबत सतर्क राहावे. “मरतूक”ची लक्षणे दिसल्यास तत्काळ नजीकच्या पशुवैद्यकीय दवाखान्याशी संपर्क साधावा, असे आवाहन जिल्हा पशुसंवर्धन अधिकारी डॉ.एन.एल. नरळे यांनी केले आहे.
राज्यातील काही जिल्ह्यामध्ये बर्ड फ्लू/एव्हिएन इन्फ्लूएन्झा (H5N1) या आजाराने कुक्कुटपक्षी व कावळ्यांमध्ये मरतूक झाल्याचे आढळून येत आहे. त्यामुळे या रोगाचा प्रादुर्भाव टाळण्यासाठी आपल्या प्रक्षेत्रावरील रोजची स्वच्छता व निर्जंतुकीकरण करून जैवसुरक्षा विषयक बाबींचे काटेकोरपणे पालन करणे आवश्यक आहे. संशयीत ठिकाणाहून पक्षांची वाहतूक टाळावी. ज्या ठिकाणी स्थलांतरीत पक्षी मोठ्या प्रमाणात आढळतात तेथील नागरिकांनी सतर्कता बाळगावी.
मानवी आहारामध्ये व्यवस्थित उकडलेली अंडी व शिजवलेले चिकन खाणे पूर्णपणे सुरक्षित आहे, याबाबत कोणीही अनावश्यक गैरसमज व अफवा पसरवू नयेत, असे आवाहन पशुधन विकास अधिकारी, सधन कुक्कुट विकास गट, नेहरूनगर सोलापूरचे डॉ.स्नेहंका बोधनकर यांनी केले आहे.
जिल्ह्यामध्ये अचानक मोठ्या प्रमाणावर पक्षांमध्ये मरतूक किंवा या आजाराचे लक्षणे आढळल्यास तत्काळ नजीकच्या पशुवैद्यकीय दवाखान्याशी संपर्क साधावा. सर्व क्षेत्रीय अधिकारी, कर्मचाऱ्यांनी आपापल्या कार्यक्षेत्रातील कुक्कुट प्रक्षेत्राला नियमित भेट देऊन जैवसुरक्षा विषयक उपाययोजनांबाबत मार्गदर्शन करावे. आपल्या कार्यक्षेत्रातील रोग प्रादुर्भावाबाबत दक्ष रहावे, असे आवाहन जिल्हा पशुसंवर्धन अधिकारी डॉ. एन.एल. नरळे यांनी केले आहे.