कन्या न्यूज सेवा: सोलापूर/तुळजापूर, दि. 20 ऑक्टोबर –
महाराष्ट्राची आराध्यदैवत कुलस्वामिनी आई श्री तुळजाभवानी मातेच्या दरबारी आकर्षक फुलांची सजावट करण्यात आली होती. दसऱ्यादिवशी सिमोल्लंघन झाल्यानंतर तुळजाभवानी माता ५ दिवस श्रम निद्रिस्त होते. त्यानंतर अश्विन पौर्णिमेदिवशी पहाटे तुळजाभवानी माता सिंहासनावर आरूढ झाली.
बुधवारी देवीच्या मूळ अष्टभूजा मूर्तीची विधीवत पूजा करण्यात आली. आकर्षक विद्युत रोषणाईने मंदिराचा परिसर उजळून निघाला होता. ही सजावट करण्यासाठी ५ टन देशी तर ७ टन विदेशी फुलांचा वापर करण्यात आला होता. ही फुले परराज्यातुन मागविण्यात आली होती. आई तुळजाभवानी मातेचा दरबारात आकर्षक फुलांची सजावट आणि विद्युत रोषणाईमुळे परिसर नयनरम्य दिसत आहे.
सजावटीसाठीमध्ये त्रिशूल, फुलपाखरु, साप, हरीण असे प्राणी फुलातून साकारण्यात आले होते. महाद्वारासमोर आई भवानी मातेची मुर्ती साकारण्यात आली आहे. या सजावटीमुळे मंदिराच्या सौंदर्यात भर पडली आहे. दरवर्षी अश्विन पौर्णिमेला तुळजाभवानी देवीच्या मंदिरात मोठी यात्रा भरते. तुळजाभवानी मंदिरातील फुलांची सजावट पुणे येथील आर. आर. किराड हे दरवर्षी मोफत करतात.
